Seneca,
Dialog.
XII,
19 (Ad Helviam matrem de consolatione), 6:
Post hoc nemo miretur quod per sedecim annos quibus Aegyptum
maritus eius optinuit numquam in publico conspecta est, neminem prouincialem
domum suam admisit, nihil a uiro petit, nihil a se peti passa est. Itaque
loquax et in contumelias praefectorum ingeniosa prouincia, in qua etiam qui
uitauerunt culpam non effugerunt infamiam, uelut unicum sanctitatis exemplum
suspexit et, quod illi difficillimum est cui etiam periculosi sales placent,
omnem uerborum licentiam continuit et hodie similem illi, quamuis numquam
speret, semper optat. Multum erat, si per sedecim
annos illam prouincia probasset: plus est quod ignorauit. Haec non ideo refero
ut laudes eius exequar, quas circumscribere est tam parce transcurrere, sed ut
intellegas magni animi esse feminam quam non ambitio, non auaritia, comites
omnis potentiae et pestes, uicerunt, non metus mortis iam exarmata naue
naufragium suum spectantem deterruit quominus exanimi uiro haerens non
quaereret quemadmodum inde exiret sed quemadmodum efferret.